ნინო ლომჯარია
პარლამენტის ადამიანის უფლებათა დაცვის კომიტეტი დღეს ნინო ლომჯარიას მოუსმენს

დღეს პარლამენტის ადამიანის უფლებათა დაცვის კომიტეტი სახალხო დამცველს ნინო ლომჯარიას მოუსმენს.ომბუდსმენი კომიტეტის წევრებს ადამიანის უფლებათა დაცვის მდგომარეობის შესახებ ყოველწლიურ ანგარიშს გააცნობს და მათ შეკითხვებს უპასუხებს.სახალხო დამცველმა პარლამენტს ანგარიში წერილობითი ფორმით ჯერ კიდევ მარტში წარუდგინა, თუმცა დოკუმენტის განხილვა საგაზაფხულო სესიის ფარგლებში არ მომხდარა.ნინო ლომჯარია პარლამენტში მომავალ კვირასაც მივა და ყოველწლიური მოხსენებით პლენარულ სხდომაზე წარსდგება.

1664519444

ირაკლი კობახიძე
"კაპიკი ფული არ აგვიღია, მაშინაც კი, როდესაც პარტიის თავმჯდომარე იყო" - ირაკლი კობახიძე ივანიშვილზე

"კაპიკი ფული არ აგვიღია, მაშინაც კი, როდესაც პარტიის თავმჯდომარე იყო," - ეს განცხადება "ქართული ოცნების" თავმჯდომარემ, ირაკლი კობახიძემ "პალიტრანიუსის" გადაცემაში "თავისუფალი სტუდია" ბიძინა ივანიშვილზე საუბრისას გააკეთა.კობახიძის მტკიცებით, ოპონენტები წარმოსახვის დონეზეც კი ვერ ამბობენ იმას, თუ როგორ შეიძლება იყოს ჩართული ბიძინა ივანიშვილი ქართულ პოლიტიკაში."ეს კაცი პოლიტიკიდან გავიდა. არამარტო ფაქტს ვერ გვეუბნებიან, როგორაა ის კაცი ჩარეული პოლიტიკაში, აღქმის დონეზეც ვერ წარმოუდგენიათ, როგორ შეიძლება ეს. დახურულ შეხვედრებზე ვეკითხებით ხოლმე - როგორ წარმოგიდგენიათ, რას აკეთებს ეს კაცი? რას შეიძლება აკეთებდეს ეს კაცი? კეზერაშვილზე ვიცით, მაგრამ ჩვენ კაპიკი ფული არ აგვიღია ამ კაცისგან. მთელი ამ წლების განმავლობაში კაპიკი ფული არ აგვიღია მაშინაც კი, როდესაც პარტიის თავმჯდომარე იყო.ანუ ეს კაცი ყოფილა გენიოსი? ფულს არ გვაძლევს. მითითებებს გვაძლევს და რა? ის, რომ ეს კაცი ვინმეს რჩევებს აძლევს და ეს არის ოლიგარქიული მმართველობა, ღიმილის მომგვრელია. მაშინ ეს კაცი უნდა ვაღიაროთ გენიოსად. კი, ყველა აღიარებს, რომ მას განსაკუთრებული შესაძლებლობები აქვს, მაგრამ ამას სჭირდება ზეადამიანური გენიალური თვისებები ანუ, ზეადამიანური გენიალური თვისებები უნდა გქონდეს, რომ თვეში ერთხელ სატელეფონო ზარით მართო სახელმწიფო. საოცრებაა. წარმოსახვის დონეზეც ვერ გვეუბნებიან, როგორ შეიძლება ის იყოს ჩართული პოლიტიკაში," - განაცხადა ირაკლი კობახიძემ.

1664478900

ირაკლი კობახიძე
"ეს არამეგობრული და არასწორი ნაბიჯია! - ამასთან დაკავშირებით ჩვენი პოზიცია ცალსახაა" - ირაკლი კობახიძე ლუკაშენკოს აფხაზეთში ვიზიტზე

"ქართული ოცნების" თავმჯდომარე ირაკლი კობახიძე "პალიტრანიუსის" გადაცემაში "თავისუფალი სტუდია" ბელორუსიის პრეზიდენტის, ალექსანდრე ლუკაშენკოს ოკუპირებულ აფხაზეთში ვიზიტს ეხმაურება.როგორც კობახიძემ განაცხადა, ლუკაშენკოს აღნიშნული ვიზიტი ბელორუსიის მხრიდან არამეგობრული ნაბიჯია."ჩვენი მხრიდან ე.წ. ვიზიტი შეფასდა როგორც ძალიან არამეგობრული და არასწორი ნაბიჯი, ამასთან დაკავშირებით ჩვენი პოზიცია ცალსახაა, დაირღვა ასევე კანონი ოკუპირებული ტერიტორიების შესახებ. ეს არის სამწუხარო და მძიმე ნაბიჯი, რომელიც ჩვენ ვიხილეთ. მთავარი ჩვენთვის აქ არის ის, რომ არ გადაიკვეთოს უკიდურესი წითელი ხაზი და ეს დაკავშირებულია არაღიარების პოლიტიკასთან. ბელარუსის სახელმწიფო დღემდე არ აღიარებს აფხაზეთს ე.წ დამოუკიდებლობას და ჩვენთვის პრინციპულად მნიშვნელოვანია ამ პოზიციის შენარჩუნება. თითოეული ჩვენი ნაბიჯი ამის მიხედვითაც უნდა გადაიდგას, როდესაც საუბარია თუნდაც რეაქციაზე. თავიდან იყო საუბარი აფხაზეთში ვიზიტზე, რაც მისი მხრიდან იყო თუ არ ვცდები ნათქვამი, ამის შემდეგ შერბილებულია ამ ე.წ. ვიზიტის სათაური და საუბარია რომ ის ჩავიდა არა აფხაზეთში, არამედ შავი ზღვის სანაპიროს ისტორიული ადგილები მოინახულა. ეს ჟესტი თავისთავად რაღაცის მანიშნებელია, ანუ იმის, რომ ჩვენ შეგვიძლია დავიტოვოთ იმედი არაღიარების პოლიტიკის შენარჩუნებასთან დაკავშირებით. ამ კუთხით ჩვენი მხრიდან ყველაფერი უნდა გაკეთდეს," - განაცხადა კობახიძემ.ცნობისთვის, ბელარუსის პრეზიდენტი ალექსანდრ ლუკაშენკო დღეს ოკუპირებულ აფხაზეთში ჩავიდა, სადაც ოკუპირებული აფხაზეთის დე ფაქტო პრეზიდენტ ასლან ბჟანიას შეხვდა.მოგვიანებით კი, საქართველოს საგარეო უწყებამ ალექსანდრ ლუკაშენკოს ოკუპირებულ აფხაზეთში ჩასვლის გამო, ბელარუსის მხარეს დამატებითი განმარტებები მოსთხოვა, შემდეგ კი განცხადება გაავრცელა, სადაც ნათქვამია, რომ ოკუპირებულ აფხაზეთში ლუკაშენკოს "ვიზიტი" უხეშად არღვევს საერთაშორისო სამართლის ფუნდამენტურ პრინციპებსა და ნორმებს.

1664476122

ირაკლი კობახიძე
"ჩვენს პირობებში, სტრატეგიულ-ეკონომიკური ობიექტების კუთხით ნული პროგრესი ჰქონდა რუსეთის ფედერაციას. მანამდე იყო ფუნდამენტურად განსხვავებული შედეგები" - ირაკლი კობახიძე

"ჩვენს პირობებში, სტრატეგიულ-ეკონომიკური ობიექტების კუთხით ნული პროგრესი ჰქონდა რუსეთის ფედერაციას. მანამდე იყო ფუნდამენტურად განსხვავებული შედეგები," - ამის შესახებ "ქართული ოცნების" თავმჯდომარემ, ირაკლი კობახიძემ "პალიტრანიუსის" ეთერში განაცხადა.როგორც კობახიძემ განაცხადა, "ნაცმოძრაობის" მმართველობის პერიოდში საქართველომ დაკარგა ქვეყნის 20 % ასევე, მოხდა სტრატეგიულ-ეკონომიკური ობიექტების გადაცემა რუსეთისთვის."რუსეთს ჰქონდა ფუნდამენტური წინსვლა გავლენების გაფართოების კუთხით საქართველო ტერიტორიაზე. ეს გამოიხატა 20 პროცენტის მიტაცებით, სტრატეგიული-ეკონომიკური ობიექტების წაღებით. მთავარი სტრატეგიული ობიექტები წაიღეს, მათ შორის, კომუნალური სერვისები პრაქტიკულად, მთლიანად ხელში მისცეს რუსეთის ფედერაციას. 2006 წელს რაც ხდებოდა, გახსოვთ, ქართველების გამოსახლება რუსეთის ფედერაციიდან და ა.შ. მანამდე რა ხდებოდა? ვიდრე ნაცმოძრაობა უბედურებას დამართებდა ამ ქვეყანას, მანამდე ჩვენ ვაკონტროლებდით ცხინვალის რეგიონში დასახლებული ტერიტორიების დაახლოებით 2/3-ს და ვაკონტროლებდით აფხაზეთში კოდორის ხეობას.ეს იყო მანამდე მოცემულობა. წაიღეს, როგორც კოდორის ხეობა, ასევე, ცხინვალის რეგიონში დასახლებული ტერიტორიების დაახლოებით 2/3, 200 სოფელი რასაც სააკაშვილმა შემდეგ ქვების გროვა უწოდა. ეს იყო მათი პოლიტიკის შედეგი და სტრატეგიული ობიექტები, ადამიანების გამოსახლების და ათასი უბედურება. რაც შეეხება, ჩვენი პოლიტიკის შედეგებს. ქართული ოცნების ხელისუფლება არის პირველი ხელისუფლება, რომლის დროსაც ამ 30 წლის მანძილზე ომი არ ყოფილა და შენარჩუნდა მშვიდობა. ეს არის პირველი მიღწევა, რაც ძალიან პრინციპულია და რასაც თავისი სერიოზული შედეგები ჰქონდა.არც ერთი სტრატეგიული ობიექტი არ გადასულა რუსეთი გამგებლობაში. ჩვენი ხელისუფლების პირობებში. „პრორუსებს“ ხომ გვეძახიან? და თვითონ ხომ არიან პროდასავლელები? თვითონ გააფართოვეს რუსეთის გავლენა ფუნდამენტურად, საქართველოს ტერიტორიაზე, ჩვენს პირობებში, არც ტერიტორიების კუთხით არ ყოფილა მათი მხრიდან წინსვლა და რაც შეეხება, სტრატეგიულ-ეკონომიკურ ობიექტებს, ამ კუთხით ნული პროგრესი ჰქონდა რუსეთის ფედერაციას საქართველოს ტერიტორიაზე.მანამდე იყო ფუნდამენტურად განსხვავებული შედეგები. რაც შეეხება, ბორდერიზაციას, ბორდერიზაციაც არის წინა ხელისუფლების მემკვიდრეობა. ბორდერიზაცია დაიწყო, სწორედ, 2008 წელს, მიმდინარეობდა 4 წლის განმავლობაში და მერე გაგრძელდა, მაგრამ ეს არის მათი მემკვიდრეობა. ზუსტად იმის მემკვიდრეობა, რომ მათ ჩააბარეს ქვეყნის 20 პროცენტი რუსეთის ფედერაციას," - განაცხადა ირაკლი კობახიძემ.

1664473427

ნიკოლოზ სამხარაძე
აფხაზეთში ლუკაშენკოს ვიზიტი საქართველოს და ბელარუსის ურთიერთობებს ძირს უთხრის" - ნიკოლოზ სამხარაძე

"აფხაზეთში ლუკაშენკოს ვიზიტი საქართველოს და ბელარუსის ურთიერთობებს ძირს უთხრის," - ამის შესახებ "ქართული ოცნების" წევრმა, ნიკოლოზ სამხარაძემ ბელორუსიის პრეზიდენტის ოკუპირებულ აფხაზეთში ვიზიტზე საუბრისას განაცხადა."გუშინ, აფხაზეთში ლუკაშენკოს ვიზიტი არის ცალსახად საქართველოს სუვერენიტეტის ძალიან უხეში დარღვევა, საქართველოს ტერიტორიული მთლიანობის და ყველა ფუნდამენტური პრინციპის, რომელიც არის საერთაშორისო სამართალში. შესაბამისად, რა თქმა უნდა, ეს ჩვენთვის მიუღებელია.ყველაფერ ამასთან ერთად ეს არის საქართველოს ოკუპაციის კანონის დარღვევაც, ამიტომ ჩვენ გვაქვს, რა თქმა უნდა, ძალიან მკაცრი პოზიცია ამ საკითხთან დაკავშირებით. ეს არის საქართველოს და ბელარუსს შორის ურთიერთობებისთვის, მათ შორის დიპლომატიური ურთიერთობებისთვის ძირის გამოთხრა. შესაბამისად, ჩვენ ვერ ვისაუბრებთ, ამ შემთხვევაში იმაზე, რომ ჩვენსა და ბელარუსს შორის ამის შემდეგ ნორმალურად გაგრძელდება და განვითარდება ურთიერთობები, მანამ სანამ არ მივიღებთ მკაფიო და ცალსახა ახსნა-განმარტებას იმაზე, თუ რას ემსახურებოდა ეს ე.წ ვიზიტი," - განაცხადა სამხარაძემ.ცნობისთვის, ბელარუსის პრეზიდენტი ალექსანდრ ლუკაშენკო დღეს ოკუპირებულ აფხაზეთში ჩავიდა, სადაც ოკუპირებული აფხაზეთის დე ფაქტო პრეზიდენტ ასლან ბჟანიას შეხვდა.მოგვიანებით კი, საქართველოს საგარეო უწყებამ ალექსანდრ ლუკაშენკოს ოკუპირებულ აფხაზეთში ჩასვლის გამო, ბელარუსის მხარეს დამატებითი განმარტებები მოსთხოვა, შემდეგ კი განცხადება გაავრცელა, სადაც ნათქვამია, რომ ოკუპირებულ აფხაზეთში ლუკაშენკოს "ვიზიტი" უხეშად არღვევს საერთაშორისო სამართლის ფუნდამენტურ პრინციპებსა და ნორმებს.

1664468460

15/07/2022
"ევროკავშირი გმობს ლუკაშენკოს ვიზიტს აფხაზეთში" - პიტერ სტანო

"ევროკავშირი გმობს ლუკაშენკოს ვიზიტს აფხაზეთში, ეს ვიზიტი განხორციელდა საქართველოს მთავრობის თანხმობის გარეშე, რომელიც არის აფხაზეთის ერთადერთი ლეგიტიმური ხელისუფლება," - ამის შესახებ ევროკომისიის პრესსპიკერმა პიტერ სტანომ ბრიუსელში გამართულ ბრიფინგზე განაცხადა."ევროკავშირი მკაცრად გმობს ალექსანდრ ლუკაშენკოს ვიზიტს საქართველოს აფხაზეთში, სეპარატისტულ რეგიონში იმ ფაქტის მიუხედავად, რომ პიროვნებას, ლუკაშენკოს არ აქვს არანაირი ლეგიტიმურობა, იმოქმედოს როგორც სახელმწიფოს მეთაურმა. ეს ვიზიტი განხორციელდა საქართველოს მთავრობის თანხმობის გარეშე, რომელიც არის აფხაზეთის რეგიონის ერთადერთი ლეგიტიმური ხელისუფლება. ასე რომ, ეს ვიზიტი არღვევს საქართველოს სუვერენიტეტს, ტერიტორიულ მთლიანობას და წარმოადგენს საერთაშორისო სამართლის უხეშ დარღვევას. ერთადერთი, რაც შემიძლია, დავამატო, შემიძლია, დავადასტურო ევროკავშირის მტკიცე და ძლიერი მხარდაჭერა საქართველოს ტერიტორიული მთლიანობისა და სუვერენიტეტისადმი საერთაშორისოდ აღიარებულ საზღვრებში," – განაცხადა პიტერ სტანომ.ცნობისთვის, ბელარუსის პრეზიდენტი ალექსანდრ ლუკაშენკო დღეს ოკუპირებულ აფხაზეთში ჩავიდა, სადაც ოკუპირებული აფხაზეთის დე ფაქტო პრეზიდენტ ასლან ბჟანიას შეხვდა.მოგვიანებით კი, საქართველოს საგარეო უწყებამ ალექსანდრ ლუკაშენკოს ოკუპირებულ აფხაზეთში ჩასვლის გამო, ბელარუსის მხარეს დამატებითი განმარტებები მოსთხოვა, შემდეგ კი განცხადება გაავრცელა, სადაც ნათქვამია, რომ ოკუპირებულ აფხაზეთში ლუკაშენკოს "ვიზიტი" უხეშად არღვევს საერთაშორისო სამართლის ფუნდამენტურ პრინციპებსა და ნორმებს.

1664467800

სოზარ სუბარი მიხეილ ყაველაშვილი დიმიტრი ხუნდაძე
"რადიკალური ოპოზიციის განცხადებები ადასტურებს, რომ მეორე ფრონტის საფრთხე ჯერ კიდევ არ არის გადავლილი, ხელისუფლებას და საზოგადოებას განსაკუთრებული ყურადღება მართებთ" - მოძრაობა "ხალხის ხმა"

"ქართული ოცნებიდან" წასული დეპუტატები ერთობლივ განცხადებას ავრცელებენ, რომლითაც "სტრატეგია აღმაშენებლის" ლიდერის, გიორგი ვაშაძის გუშინდელ განცხადებას პასუხობენ."გუშინ, რადიკალური ოპოზიციის ერთ-ერთმა წარმომადგენელმა, გიორგი ვაშაძემ საინტერესო განცხადება გააკეთა – „ჩემი ინფორმაციით, უკრაინაში ომის დაწყების მომენტიდან, ამერიკულმა მხარემ საქართველოს მხარეს თავდაცვისუნარიანობის გაძლიერებისთვის მრავალმილიარდიანი პაკეტი შესთავაზაო“. მისი თქმით, ეს დახმარება, მათ შორის უკრაინელ მფრინავებთან ერთად ქართველი მფრინავების გადამზადებასაც ითვალისწინებდა. საინტერესოა ისიც, რომ ვაშაძემ საქართველოსთვის იარაღის მიწოდების მთავარ მექანიზმად ე.წ. „ლენდლიზი“ დაასახელა. უკრაინის მაგალითზე, კარგად ვიცით, რომ „ლენდლიზის“ დამტკიცებასა და ამოქმედებას რამდენიმე თვე სჭირდება, რაც ნიშნავს რომ „ლენდლიზის“ ინიცირების პირობებში, რუსეთს საკმარისი დრო ექნებოდა, რათა საქართველოს სრული ოკუპაცია ამერიკიდან დაანონსებული იარაღის შემოსვლამდე განეხორციელებინა, მანამდე კი, ქართველ სამხედროებს რუსეთის არმიასთან უთანასწორო დაპირისპირება ამჟამად არსებული რესურსით მოუწევდათ. ვაშაძის განცხადება ფართოდ აიტაცეს გიგა ბოკერიამ, შოთა უტიაშვილმა, ბაჩო დოლიძემ და „ნაცმოძრაობის“ კუთვნილმა ტელევიზიებმა. მათ სხვადასხვა ფორმით, პრაქტიკულად, დაადასტურეს ვაშაძის ინფორმაცია და უკრაინაში ომის დაწყების შემდეგ უკრაინისთვის შეიარაღების არგადაცემისა და ამერიკიდან შეიარაღების არმიღების გამო საქართველოს ხელისუფლება მწვავედ გააკრიტიკეს. ბავშვისთვისაც კი ცხადია, თუ რა შედეგს გამოიღებდა საქართველოს ხელისუფლების მიერ როგორც უკრაინისთვის შეიარაღების გადაცემა, ისე ამერიკიდან შეიარაღების მობილიზება. ამით ძალიან მარტივად შეიქმნებოდა საბაბი რუსეთის სამხედრო ინტერვენციისა და მეორე ფრონტისთვის, რის გარშემოც რადიკალურ ოპოზიციას თებერვალ-მარტში ღია კამპანია ჰქონდა გაშლილი.აქ მთავარი ის არ არის, მართალია თუ არა ვაშაძის, ბოკერიას, უტიაშვილის, დოლიძისა და სხვების მიერ გავრცელებული ინფორმაცია. ამ ადამიანებს ტყუილი ბევრჯერ უკადრიათ და დარწმუნებული ვართ, ამ კუთხით, თავს არც ამ შემთხვევაში დაზოგავდნენ. აქ მთავარი ისაა, რომ ეს ადამიანები დავალების გარეშე არცერთ განცხადებას არ აკეთებენ. შეგახსენებთ, რომ ახალი კამპანიის ინიციატორი ის გიორგი ვაშაძეა, რომელსაც რამდენიმე თვის წინ, ევროკავშირის კანდიდატის სტატუსის არმინიჭებამდე ცოტა ხნით ადრე, „უფლება მისცეს“, ვაშინგტონიდან ამერიკის სახელით საქართველოს ხელისუფლებას გადატრიალებითა და რიგგარეშე არჩევნებით დამუქრებოდა. ჩვენ რამდენჯერმე ვთხოვეთ ამერიკის ელჩს, ვაშაძის ამ განცხადებას გამიჯვნოდა, თუმცა, ყოველ ჯერზე პასუხად დუმილი მივიღეთ. ყველაზე საინტერესო კი ისაა, თუ რაში დასჭირდა საელჩოს ამ ადამიანებისთვის ეთქმევინებინა, რომ ამერიკა ჩვენს ქვეყანას დამანგრეველი მეორე ფრონტისთვის ამზადებდა.ჩვენ ძალიან კარგად ვიცით, რომ საელჩო ყველანაირად ცდილობდა, საქართველოს ხელისუფლება ომზე დაეყოლიებინა, რაზეც ღიად ზრუნვა მათ ჯერ კიდევ უკრაინაში ომის დაწყებამდე რამდენიმე დღით ადრე დაიწყეს. თუმცა, როდესაც ხელისუფლებისგან ეს შედეგი ვერ მიიღეს, საზოგადოების რეაქცია მოსინჯეს. საელჩომ ომის დაწყებისთანავე, განსაკუთრებით თებერვალ-მარტში, გიგაურის, ლომჯარიას, მარგველაშვილის, ილვესის, პოდოლიაკის, დანილოვის და სხვათა პირით არაერთხელ სცადა, ქართულ საზოგადოებაში მეორე ფრონტის იდეა მოემწიფებინა. თუმცა, როგორც კი დაინახეს, რომ ქართულმა საზოგადოებამ რუსეთთან ომს მშვიდობა და ორნიშნა ეკონომიკური ზრდა არჩია, კამპანია მაშინვე შეწყვიტეს და პირიქით, საყოველთაო თავის მართლებაზე გადავიდნენ, არც ჩვენ და არც ჩვენს ქართველ თანამშრომლებს მეორე ფრონტი არ გვინდაო. თუმცა, ახლა, იმ ფონზე, როდესაც უკრაინამ ფრონტზე წარმატებებს მიაღწია, როგორც ჩანს, საელჩომ ქართული საზოგადოების განწყობის ხელახლა გატესტვა გადაწყვიტა. თუ საელჩო დაინახავს, რომ საზოგადოების უარყოფითი რეაქცია საკმარისად მძაფრი არაა, მეორე ფრონტის კამპანიას ხელახლა აქტიურად წამოიწყებს და ამ კამპანიაში შეიძლება თავადაც კი ღიად ჩაერთოს. საელჩოს სურვილი, საქართველოში მეორე ფრონტი გაჩაღდეს, აშკარად იმდენად ძლიერია, რომ მათ კარტების ხელახლა გახსნა დაიწყეს და ამ თემაზე მათი გამორჩეული ფავორიტები აალაპარაკეს.რადიკალური ოპოზიციის ეს განცხადებები ადასტურებს, რომ საქართველოში მეორე ფრონტის საფრთხე ჯერ კიდევ გადავლილი არაა და როგორც ხელისუფლებას, ისე საზოგადოებას განსაკუთრებული ყურადღება მართებთ, რათა შეცდომა არ დაუშვან და ეს საფრთხე საბოლოოდ ავიცილოთ თავიდან. დასასრულს, ამ შემთხვევაშიც მოვუწოდებთ ამერიკის ელჩს, გამოვიდეს და საჯაროდ უარყოს რადიკალური ოპოზიციის განცხადებები, საიდანაც ირკვევა, რომ ამერიკა საქართველოს მეორე ფრონტისთვის ამზადებდა. წინააღმდეგ შემთხვევაში, საზოგადოებას ექნება სრული უფლება იფიქროს, რომ ეს განცხადებები სინამდვილეს შეესაბამება და საელჩოს თავის მართლება იმის თაობაზე, რომ მას საქართველოში ომი არ უნდა, ფარსი და ქართველი ხალხისთვის თვალის ახვევის მცდელობაა“, – ნათქვამია განცხადებაში.

1664467320

გიგა ბოკერია
"კეზერაშვილს უფლება აქვს, როგორც დევნილ პოლიტიკურ ფიგურას, პოლიტიკაში იყოს, ოღონდ ღიად" - გიგა ბოკერია

"ჩემი გამოცდილებითაც და ლოგიკითაც, ის ნაწილი არის გულწრფელი, სადაც ივანიშვილის მიმართ მის მოტივაციაზე საუბრობს და ის ნაწილი, რომ ამ ბრძოლისას მის პოზიციას არ მოუხდენია ან არ მოახდენს გავლენას იმათზე, ვინც მზად არის, რომ შეიცვალოს პოზიცია, ამ ფაქტორების გავლენით არ არის გულწრფელი." - ასე ეხმიანება "ევროპული საქართველოს" ლიდერი გიგა ბოკერია თავდაცვის ყოფილი მინისტრის, დავით კეზერაშვილის მიერ გავრცელებულ განცხადებას.მისივე თქმით, კეზერაშვილი სჯობდა, რომ ბოლომდე გულწრფელი ყოფილიყო იმ კუთხით, რომ მას ივანიშვილთან ბრძოლის ამოცანა აქვს და რაც სწორად მიაჩნია ამ ბრძოლისთვის, იმ გადაწყვეტილებებს იღებს, რომელიც მერე გავლენას ახდენს."ჩემი აზრით, ეს უფრო გულწრფელი ნათქვამია, ვიდრე პოზა, რომ ყველაფერზე მაღლა დგახარ. თავისთავად საკითხის დაყენება, რომ თურმე ეს კამათი, რომელიც პოლიტიკური პარტიების შიგნით ხდება რაღაც საკითხებზე ან პარტიებს შორის არის რაღაც კინკლაობა და ჩვენ ამაზე უნდა ავმაღლდეთ, ხშირად არის ან არაგულწრფელი ან ზედაპირული იმიტომ, რომ კამათის საგანი ისიც არის თუ რა გზა არის სწორი ამ ქვეყნისთვის ივანიშვილის დასამარცხებლად. ამიტომ, ყველა ადამიანი, ვისაც მოტივაცია აქვს ივანიშვილის დამარცხებაში თავის გადაწყვეტილებებით, ძალიან ხშირად, პირდაპირ ახდენს გავლენას იმაზე, როგორ მოიქცევიან ესა თუ ის პოლიტიკური ძალები," - განაცხადა ბოკერიამ და დასძინა რომ კეზერაშვილს უფლება აქვს, როგორც დევნილ პოლიტიკურ ფიგურას, პოლიტიკაშიც იყოს, ოღონდ ღიად."ჩემი გამოცდილებითაც და ლოგიკითაც, ის ნაწილი არის გულწრფელი, სადაც ივანიშვილის მიმართ მის მოტივაციაზე საუბრობს და ის ნაწილი, რომ ამ მოტივაციაში, ამ ბრძოლისას მის პოზიციას არ მოუხდენია ან არ მოახდენს გავლენას იმათზე, ვინც მზად არის, რომ შეიცვალოს პოზიცია, ამ ფაქტორების გავლენით არ არის გულწრფელი.სჯობდა პირდაპირ ეთქვა, რომ მე სწორად რაც მიმაჩნია იმ პოზიციას ვახორციელებ და მინდა ამის მიღწევა. ჩვენთან ხშირად არის ხოლმე, რომ ვიღაცამ რაღაც თქვა და მეორემ დააბრალა რაღაცა, ამიტომ ვამატებ ამას, რომ ლოგიკურიც და ლეგიტიმურიცაა. მას უფლება აქვს, როგორც დევნილ პოლიტიკურ ფიგურას, პოლიტიკაშიც იყოს, ოღონდ ღიად. ღიად სჯობს ეს ყველაფერი ხდებოდეს, ვიდრე ამ პოზით, რომ ყველაფერზე მაღლა დგას. მე მგონია, რომ მის პოზიციას, რომ ზოგადად უნდა მომხდარიყო "ნაციონალური მოძრაობის" გარშემო შემოკრება, როლი ჰქონდა.ჩემი პოზიციიდან გამომდინარე, ნათელია, რომ ეს როლი უარყოფითად მიმაჩნია. მე მიმაჩნდა და მიმაჩნია, როგორც პრაგმატულად, ასევე პრინციპულად ძალიან ცუდ საქციელად, როგორც მოიქცნენ ჩვენი პარტიის ყოფილი ლიდერები," - განაცხადა გიგა ბოკერიამ.ცნობისთვის, თავდაცვის ყოფილი მინისტრმა, დავით კეზერაშვილმა დღეს სოციალურ ქსელში დაწერა, რომ არასდროს ჩარეულა და არც მომავალში აპირებს ჩაერიოს ცალკეული ოპოზიციური პარტიების დღის წესრიგის განსაზღვრაში. კეზერაშვილის თქმით, პარტიული პოლიტიკის მიმართ საკუთარი ინტერესი არ აქვს, ამასთან, ბუნებრივია ეს არ ნიშნავს, იმას რომ უარს იტყვის ივანიშვილის რეჟიმის წინააღმდეგ საერთო ბრძოლაზე."არ ვაპირებ შორიდან ვუყურო ჩემი მეგობრების, სააკაშვილის და გვარამიას ციხეში ყოფნას, არ მაქვს უფლება ხელისუფლების წინააღმდეგ მხარი არ დავუჭირო სამოქალაქო საზოგადოებას," - წერს დავით კეზერაშვილი. 

1664457245

დავით მათიკაშვილი
„ჩემი უპირობო მხარდაჭერა ქალბატონ თეა წულუკიანს!" - დავით მათიკაშვილი

 კულტურის მინისტრს, თეა წულუკიანს უპირობო მხარადაჭრას უცხადებს საპარლამენტო უმრავლესობის წარმომადგენელი, კულტურის კომიტეტის წევრი დავით მათიკაშვილი.მათიკაშვილი აღნიშნავს, რომ ქალბატონის მიმართ ძალადობა დაუშვებელია და მსგავსი ქმედების ავტორმა პასუხი უნდა აგოს.„ჩემი უპირობო მხარდაჭერა ქალბატონ თეა წულუკიანს!!!ვგმობ ნებისმიერ ძალადობას ან მის მცდელობას!!! ქალბატონის მიმართ ძალადობა ეწინააღმდეგება არა მხოლოდ კანონს, მორალს ან ზნეობას, არამედ ჩვულებრივ საღ აზრს, ან რომელ მრუდე ტვინში შეიძლება ასეთი რამ მოიხარშოს, გაიწიო ქალზე ძალადობის სურვილით!!!თეა წულუკიანი გამორჩეული ლიდერია და მოამაგეა თავისი ქვეყნის, რა უწყებისთვისაც არ უხელმძღვანელია, წარუშლელი დადებითი კვალი დაუმჩნევია ყველგან და ღრმად ვარ დარწმუნებული როგორც ქართულ კულტურას, ასევე ქართულ სპორტს და განსაკუთრებით ქართულ კრივს კიდევ უფრო მეტად დაეტყობა ქალბატონი მინისტრის მოამაგე ხელი!!!და ამისთვის ყველა დესტრუქციულმა ელემენტმა სათანადო პასუხი უნდა აგოს საკუთარ დესტრუქციულ ქმედებაზე!“- წერს დავით მათიკაშვილი სოციალურ ქსელში.ცნობისათვის, "ადამიანი, ვინც ჩემზე გაიწია დასარტყმელად, არის კრივის ფედერაციის ხელმძღვანელი," - განაცხადა  კულტურისა და სპორტის მინისტრმა თეა წულუკიანმა ტელეკომპანია "იმედის" ეთერში.

1664457200

თაკო ჩარკვიანი
"არ მინდა, რომ ჩამოიშალოს დასავლური ვექტორის მსხვილი ოპოზიციური პარტია, "ნაციონალური მოძრაობა" - თაკო ჩარკვიანი

"დავით კეზერაშვილთან შეხება არასდროს მქონია. არ მინდა, რომ ჩამოიშალოს დასავლური ვექტორის მსხვილი ოპოზიციური პარტია, ამიტომ ვაძლევ რჩევებს და არ მომწონს, როდესაც თავმჯდომარეს აიგივებენ პარტიასთან, თავმჯდომარეები იცვლება, არ იცვლება იდეალისტი ამომრჩეველი, რომელსაც ძალიან დიდ პატივს ვცემ, ვურჩევ ხოლმე უფრო აქტიური ლიდერი მოძებნონ, რომ გააქტიურდეს პროცესი," - ამის შესახებ "კანონი და სამართლის" ლიდერმა, თაკო ჩარკვაინმა განაცხადა.მისივე თქმით, მას ნიკა მელიას მიმართ კითხვის ნიშნები გაუჩნდა."რაც შეეხება ნიკა მელიას განცხადებას, უკიდურესად არ მომეწონა და ვთქვი, რომ პოლიტიკურ მორალს გასცილდა, პოლიტიკას თუ გამოაცლი მორალს, შეიძლება, მხოლოდ ტალახში დარჩე-მეთქი ვუთხარი. სამი თვის წინ მოვისმინე მისი განცხადება, პარტნიორად ვთვლიო, ამიტომ ლეგიტიმური კითხვაა, როდის შეიტყო კეზერაშვილის ოლიგარქობის შესახებ. ეს არ არის კარგი, ეს ორმაგი სტანდარტია. მე სხვა რამით უფრო დავინტერესდი აქ, კითხვა გამიჩნდა ნიკას მიმართ. მთელმა დასავლეთმა შეიტანა ოლიგარქიის სიაში ივანიშვილი, ყოველ შემთხვევაში ჩვენ იქ დასახელებული კეზერაშვილი არ გვინახავს. შესაბამისად, როდესაც გამოდის მსხვილი ოპოზიციური პარტიის ლიდერი და განცხადებას აკეთებს, რომ ოპოზიციას აფინანსებს ოლიგარქი, არ ბადებს ეს ლოგიკურ კითხვებს? მე გამიჩნდა კითხვა, ვის წისქვილზე დაასხა წყალი ამან, ფაქტია არა ოპოზიციის, ფაქტია, რომ „ქართული ოცნების“ წისქვილზე, თუ განზრახ დაასხა, ეს უმეცრებაა," - განაცხადა ჩარკვიანმა.ამასთან, თაკო ჩარკვიანს მედიის წარმომადგენლებმა დავით კეზერაშვილის დღევანდელ განცხადებაზეც ჰკითხეს. ჩარკვიანის თქმით, მას დავით კეზერაშვილთან შეხება არასდროს ჰქონია."მართლა არ მაქვს ინფორმაცია, შეხება არასდროს მქონია ამ ადამიანთან. საერთოდ, ვცდილობ ხოლმე, ფრთხილი ვიყო ასეთ რაღაცებში, ამიტომ ვერ გეტყვით," - აღნიშნა ჩარკვიანმა.

1664454922

ლუკაშენკო აფხაზეთში
ბელორუსი ექსპერტები ლუკაშენკოს აფხაზეთში ვიზიტს ეხმაურებიან

 ალექსანდრე ლუკაშენკოს ვიზიტს სოხუმში, აქტიური გამოხმაურება მოჰყვა ბელორუსი პოლიტიკოსებისა და პოლიტიკური ექსპერტების მხრიდან.ბელორუსი ექსპერტები ლუკაშენკოს ვიზიტის ფარული და არაფარული მიზნების გაანალიზებას ცდილობენ და წერენ, რომ ეს ვიზიტი, მოსკოვის მხრიდან ზეწოლის შედეგია.„ცხადია, ლუკაშენკომ შეცვალა დამოკიდებულება ამ რეგიონებთან. როგორც ჩანს, მისთვის ამ ეტაპზე საქართველოსთან ურთიერთობა ნაკლებად მნიშვნელოვანია. რაც შეეხება დამოკიდებულებას დასავლეთთან, ეს ურთიერთობა ვეღარ გაფუჭდება, რადგან ის უკვე აღარ არსებობს,“- წერს ბელორუსი ანალიტიკოსი არტემ შრაიბმანი.ბელორუსი პოლიტიკური მიმომხილველის, ალექსანდრე კლასკოვსკის თქმით, ლუკაშენკოს ვიზიტი აფხაზეთში იმაზე მიუთითებს, რომ ის ახლა მძიმე მდგომარეობაშია და „მოსკოვი მასზე ზეწოლას ახდენს“.„ის ფაქტი, რომ ლუკაშენკო ახლა ჩავიდა აფხაზეთში, არ ნიშნავს იმას, რომ ხვალ ის მოაწერს ხელს ბრძანებას მისი აღიარებისა და დიპლომატიური ურთიერთობების დამყარების შესახებ. ეს ვიზიტი არაოფიციალურია, თუმცა მაინც აჩენს შთაბეჭდილებას, რომ ლუკაშენკო მოსკოვთან დათმობებზე მიდის“, - ამბობს კლასკოვსკი.ის არ გამორიცხავს, რომ ამ ვიზიტით ალექსანდრე ლუკაშენკო კრემლისაგან საკუთარი სარგებლის მიღებას შეეცდება. ანალიტიკოსს ნაკლებად სავარაუდოდ მიაჩნია ბელორუსის მიერ აფხაზეთის აღიარების შესახებ რაიმე ტიპის განკარგულებისთვის ხელის მოწერა, რადგან ასეთი გადაწყვეტილება „პანდორას ყუთის“ გახსნას და სხვა არასასურველი გადაწყვეტილებების მიღებას გამოიწვევს.„ფაქტია, რომ ამან შეიძლება გახსნას პანდორას ყუთი. ხვალ მას მოსთხოვენ ე.წ. რეფერენდუმის შედეგების აღიარებას. ამასთან, აფხაზეთისა და სამხრეთ ოსეთის ჩართვა სამოკავშირეო სახელმწიფოებში, დაუყოვნებლივ დააქვეითებს ლუკაშენკოს, როგორც რუსეთის ექსკლუზიური პარტნიორის სტატუსს,“- ამბობს კლასკოვსკი.სიმბოლურ ჟესტს უწოდებს ბელორუსის ლიდერის ვიზიტს აფხაზეთში ბელორუსი პოლიტოლოგი ანდრეი ეგოროვი.„ლუკაშენკო ჩავიდა აფხაზეთში, სიმბოლურად დაუჭირა მხარი, მაგრამ ფაქტობრივად არ გაუკეთებია ოფიციალური აღიარება, რადგან ამ შემთხვევაში ბელორუსია დაზარალდება. ეს ლუკაშენკოს მხრიდან ტრადიციული საქციელია", -ამბობს ეგოროვი.

1664453403

ჭოუ ციენი
"სამარყანდის სამიტით რეგიონული თანამშრომლობის ახალი ეტაპი იწყება" - ჩინეთის ელჩი საქართველოში ჭოუ ციენი

ჩინეთის სახალხო რესპუბლიკის ელჩი საქართველოში ჭოუ ციენი, სტატიას აქვეყნებს სათაურით "სამარყანდის სამიტით რეგიონული თანამშრომლობის ახალი ეტაპი იწყება", რომელშიც საუბარია პრეზიდენტ სი ძინპინის  შეხვედრებსა და მის მიერ წარმოდგენილ 5 რეკომენდაციაზე. სტატიას GTmedia უცვლელად გთავაზობთ:"დღეს არასტაბილური ვითარებაა მსოფლიოში. უკრაინაში დაძაბულობის განმუხტვა ჯერ არ არის მოსალოდნელი. ასეთ არამდგრად სიტუაციაში მსოფლიოში მშვიდობისა და განვითარების შენარჩუნება და რეგიონული „ცხელი“ საკითხების მოგვარება ყველა ქვეყნის ინტერესის საგანია.პრეზიდენტმა სი ძინპინმა  სამარყანდში გამართულ შანხაის თანამშრომლობის ორგანიზაციის (შთო) სახელმწიფო მეთაურთა საბჭოს 22-ე სხდომაზე ამ შეკითხვებს უპასუხა. პრეზიდენტმა სი ძინპინმა შთო-ს წარმატებული გამოცდილება შეაჯამა. მან ხაზი გაუსვა პოლიტიკური ნდობის, ურთიერთსარგებლიანი თანამშრომლობის, თანასწორობის, გახსნილობისა და ინკლუზიურობის, სამართლიანობის შენარჩუნების მნიშვნელობას. მან აღნიშნა, რომ ეს „ხუთი პუნქტი“ შანხაის სულისკვეთებას გამოხატავს.შთო-ს სამომავლო განვითარებასთან დაკავშირებით, პრეზიდენტმა სი ძინპინმა აღნიშნა, რომ ახალი პირობების გათვალისწინებით, ორგანიზაციამ, როგორც მნიშვნელოვანმა კონსტრუქციულმა ძალამ საერთაშორისო და რეგიონულ საქმეებში, ცვალებად საერთაშორისო ვითარებას თვალი უნდა გაუსწოროს, ეპოქის მაჯისცემას არ ჩამორჩეს, გააძლიეროს სტრატეგიული დამოუკიდებლობა და თანამშრომლობა, ხელი შეუწყოს უფრო მჭიდრო და „საერთო მომავლის მქონე“ შანხაის თანამშრომლობის ორგანიზაციის შექმნას.ამ მიზნით, პრეზიდენტმა სი ძინპინმა ხუთი რეკომენდაცია წამოაყენა. მან ხაზი გაუსვა ურთიერთმხარდაჭერის, უსაფრთხოების სფეროში თანამშრომლობის, საქმიანი თანამშრომლობის, ხალხთაშორისი კავშირების და მულტილატერალიზმის გაძლიერების აუცილებლობას. ეს რეკომენდაციები შეესაბამება წევრი სახელმწიფოების საერთო მისწრაფებას, რაც გულისხმობს ერთობის, სტაბილურობისა და განვითარების მიღწევას. ისინი შთო-ს განვითარების კურსსა და თანამშრომლობის ახალ პერსპექტივებს განსაზღვრავს.პრეზიდენტ სი ძინპინის და მონაწილე ქვეყნების ლიდერების ერთობლივი ძალისხმევით, სამარყანდის სამიტზე 40-ზე მეტი დოკუმენტი იქნა მიღებული, რომლებიც ეკონომიკას, ფინანსებს, მეცნიერებას, ტექნოლოგიებს, კულტურულ კავშირებს, ინსტიტუციების გაძლიერებას, საგარეო ურთიერთობებსა და სხვა მიმართულებებს ეხება.განსაკუთრებით აღსანიშნავია, რომ ჩინური მხარის ხელშეწყობით, წევრი ქვეყნების მეთაურებმა ოთხი მნიშვნელოვანი დეკლარაცია მიიღეს საერთაშორისო ენერგეტიკული უსაფრთხოების შენარჩუნების, საერთაშორისო სასურსათო უსაფრთხოების შენარჩუნების, კლიმატის ცვლილების და მიწოდების ჯაჭვების უსაფრთხოების, სტაბილურობისა და დივერსიფიკაციის შესახებ.გარდა ამისა, ჩინურმა მხარემ განაცხადა, რომ შეიქმნება ჩინეთ-შთოს ანტიტერორისტული პროფესიული სასწავლო ბაზა, სამრეწველო და მიწოდების ჯაჭვების ფორუმი, დიდი მონაცემების თანამშრომლობის ცენტრი, ხოლო გადაუდებელი საჭიროების მქონე განვითარებადი ქვეყნებისთვის ჰუმანიტარული დახმარების სახით გამოიყოფა 1.5 მილიარდი იუენის ოდენობის სურსათი. ეს პრაქტიკული ქმედებები სხვადასხვა ქვეყნის საჭიროებებს აკმაყოფილებს, რაც აჩვენებს, რომ ჩინეთი არა მხოლოდ გლობალური განვითარების და გლობალური უსაფრთხოების ინიციატივების წამომწყები, არამედ მათი აქტიური შემსრულებელიცაა.სამიტის პარალელურად, პრეზიდენტმა სი ძინპინმა ყაზახეთსა და უზბეკეთში ოფიციალური ვიზიტი განახორციელა და სამარყანდის სამიტში მონაწილე 10 ქვეყნის მეთაურებთან ორმხრივი შეხვედრები გამართა, მათ შორის იყვნენ საქართველოს მეზობელი ქვეყნების, აზერბაიჯანისა და თურქეთის ლიდერები.ამ სამიტზე შანხაის თანამშრომლობის ორგანიზაციის გაფართოების ახალი ეტაპი დაიწყო. მხარეთა ერთობლივი გადაწყვეტილებით, ორგანიზაციაში ოფიციალურად გაწევრიანდა ირანი, ხოლო ბელორუსის გაწევრიანების პროცედურა დაიწყო. ეგვიპტე, საუდის არაბეთი და ყატარი გახდნენ ორგანიზაციის ახალი პარტნიორი ქვეყნები. ამასთან, გადაწყდა, რომ ბაჰრეინი, მალდივები, არაბთა გაერთიანებული საამიროები, ქუვეითი და მიანმარი მომავალში ასევე გახდებიან პარტნიორი ქვეყნები. ამის შედეგად, შთო-ს, როგორც მსოფლიოში ყველაზე ხალხმრავალი და ყველაზე ფართო რეგიონალური თანამშრომლობის ორგანიზაციის პოზიცია და გავლენა გაიზარდა.რამდენიმე დღის წინ, პრემიერ მინისტრმა ირაკლი ღარიბაშვილმა გაეროს 77-ე სესიაზე სიტყვით გამოსვლისას აღნიშნა, რომ „უსაფრთხოებას მოაქვს სტაბილურობა, სტაბილურობას კი – პროგნოზირებადობა. მდგრადი ეკონომიკური განვითარების გადამწყვეტი წინაპირობაა პროგნოზირებადობა“. ეს კარგად შეესაბამება სამარყანდის სამიტზე მხარეთა მიერ მიღწეულ თანამშრომლობის კონსენსუსს და ერთობის, სტაბილურობისა და განვითარების თაობაზე მათ საერთო მისწრაფებას. რთული ვითარების ფონზე, „შანხაის სულისკვეთების“ სიცოცხლისუნარიანობა, თანმიმდევრულობა და მიზიდულობა კარგად გამოჩნდა.სამარყანდში პრეზიდენტმა სი ძინპინმა აღნიშნა, რომ უნდა განხორციელდეს „სარტყლისა და გზის“ ინიციატივის თითოეული ქვეყნის განვითარების სტრატეგიებთან და რეგიონული თანამშრომლობის ინიციატივებთან შესაბამისობა. მან მხარეებს მრავალმხრივი და სუბრეგიონალური თანამშრომლობის გაფართოებისკენ მოუწოდა. გეოგრაფიულად, საქართველო შთო-ს ახლო მეზობელია. ამასთან, იგი „სარტყლისა და გზის“ ინიციატივის მნიშვნელოვანი პარტნიორია. ჩვენ მზად ვართ, გამოვიყენოთ ეს ხელსაყრელი ფაქტორები ორ ქვეყანას შორის ნდობისა და მეგობრობის განსამტკიცებლად, „სარტყლისა და გზის“, ეკონომიკის, ვაჭრობის, კულტურის, მეცნიერების, განათლების და სხვა სფეროებში თანამშრომლობის გასაღრმავებლად,"- ნათქვამია ინფორმაციაში. 

1664453211